Bøndene produserer rein mat, levande kulturlandskap, og er viktig for at det bur folk i heile kommunen. Landbrukspolitikken er av den grunn heilt avgjerande for framtida til Sunnfjord kommune.

Senterpartiet vil gje ein hyllest til den norske bonden. Dei jobbar hardt for kvar ei krone. Gras, mjølk, kjøt, frukt, grønsaker, korn og poteter tryllar dei fram frå jorda og gjev oss det viktigaste av alt. Mat på bordet kvar einaste dag. Bonden haustar når veret er godt, og det er slett ingen åtte-timars dag. Dagen er ferdig når jobben er gjort.

Sunnfjord kommune er den største landbrukskommunen i Vestland fylke. Vi har 510 aktive gardsbruk med ein årleg produksjon på 24 millionar liter mjølk, og vi har ein stor kjøtproduksjon på storfe og sau. Totalt driftar jordbruket nærare 100 000 daa jordbruksareal. Ikkje nok med det. Sunnfjord er den nest største landbrukskommunen i landet, berre slått av Indre Østfold.

Siste års hendingar med pandemi og krig i Europa har synt oss kor sårbare vi er. Kor viktig eiga matforsyning er, og det å ha kontroll over energiforsyninga, både for beredskap, sjølvforsyning og straum til alle som lever i Norge.

Senterpartiet har sikra landbruket historisk gode jordbruksoppgjer dei siste to åra, samt betra investeringsordningane for bonden vesentleg. Men det skal meir til for å trygge vår lokale matvareproduksjon og eit levande landbruk i heile Sunnfjord kommune.

Senterpartiet i Sunnfjord vil ha ei offensiv satsing på landbruket, og vil sette i verk eit prosjektretta arbeid for å stimulere til investeringslyst, aktivitet og lys i husa, og arbeide for å oppretthalde mjølk og kjøtproduksjonen på gardane. Vi vil:

1.       Jobbe for gode støtteordningar til investeringar i landbruket, samt sikre generasjonsskifte på gardane

2.       Auke produksjon av grønt, frukt og bær

3.       Auke verdiskapinga i skognæringa, der skogen får ei vesentleg rolle i det grøne skifte

4.       Sjå på garden som grunnlag for turisme, nye næringar, lokal mat og drikke

5.       Legge til rette for garden som grunnlag for entreprenørskap og lokalsamfunnsutvikling

6.       Utnytte garden sine ressursar innan meir fornybar energi

7.       Utnytte og foredle garden sine jakt- og fiskeressursar med mål om auka næringsaktivitet  

8.       Bidra til god ressursutnytting og miljøvenlege løysingar

Senterpartiet meiner at vi må forbetre landbruket, ikkje legge det ned. Vi trenge miljøvenlege løysingar, meir norskprodusert mat og mindre import. Senterpartiet seier ja til berekraftig norsk mat!

Det er ikkje til å forstå at Norske beitedyr blir sett på som klimafiendtlege. Norske husdyr er ikkje eit klimaproblem. Tvert om produserer dei berekraftig rein og trygg mat, og kjøt og mjølk som befolkninga treng.

Beitedyra et gras og mat vi ikkje elles kan nyttiggjere oss. Det er god ressursutnytting i praksis. Dei opprettheld eit levande kulturlandskapet, held landskapet ope, og sikrar matvareberedskapen.

Det blir helt feil når det norske landbruket vert peika ut som klimasyndarar. Klimakur 2030 foreslår tiltak som kuttar inntil 5000 årsverk og medfører nedlegging av 10% av norsk landbruksareal. Klimakur vil ha 70% færre ammekyr, 40 % færre sauer/lam, 15% færre mjølkekyr og geit. Korleis kan det vere meir miljøvennleg å erstatte desse dyra med importert kjøt frå Sør Amerika?

Mange bur i, eller har røter frå, ei fin lita bygd eller grend. Det er framleis lys i husa, men det er ikkje lenger sjølvsagt i våre dagar. Stadar som er umisseleg vakre, men samtidig tøffe å skaffe seg eit levebrød i.  

Senterpartiet heiar på den norske bonden og alle andre som syter for lys i husa og aktive grender. Derfor kjøper vi norsk mat og norske varer. Vi ønsker eit levande Norge og levande lokalsamfunn i Sunnfjord kommune. Bonden har forvalta og nytta naturen vår med respekt og omsut i tusenvis av år.

Denne arven skal vi forvalte med respekt og hegne om for framtida. Ingen kan gjere jobben betre enn den norske bonden eller våre eigne bønder i Sunnfjord kommune.  

Jenny Følling – ordførarkandidat Senterpartiet

Oddmund Klakegg – fylkestingskandidat Senterpartiet

Juleklokkene ringer snart inn jula 2021. Eg vil takke alle i bygd og by i vår flotte kommune for ein formidabel innsats i året vi legg bak oss. Takk til helsepersonell, lærarar, leiarar, reinhaldarar og alle som har stått på for å halde hjula i gang, og som fortenar stor respekt.

Eg er stolt over dugnadsinnsatsen folk i Sunnfjord har vore med på. Saman har vi fått fram det beste i kvarandre. For både samfunnet og næringslivet har blitt sett på prøve i eit år som har vore svært spesielt, og prega av korona og usikkerheit. Folk har slutta opp om tiltaka som er sette i verk. Det har vore stor oppslutning om vaksineringa, noko som ikkje minst vil redusere belastninga på helsevesenet. Den beste julegåva vi kan gje kvarandre er å ta vaksinen.

Det er mange som lengtar etter ein normal situasjon igjen. Eg skulle så gjerne ha sett at året fekk ei anna avslutning enn det vi no opplever. Men til tross for pandemien så er det store bildet at det etter måten har gått bra både med den nye kommunen og med måten vi har handtert korona-krisa på. Og som kommunelegen vår Øystein Furnes peikar på, må vi framover rette meir fokus på korleis vi skal leve med korona. Det er i alle fall ikkje tvil om at tilsette og frivillige har gjort ein enorm stor innsats og tatt eit stort ansvar.

Visjonen og verdiane til Sunnfjord kommune illustrerer på ein god måte arbeidet i 2021 der både politikarar og tilsette har arbeidd hardt og vore engasjerte for å skape ein ny og god kommune i ei tid der det har vore ekstra viktig å vere både inkluderande og nær.

Det er ein imponerande aktivitet og stor investeringslyst i Sunnfjord kommunen. Fleire store riks- og fylkesvegprosjekt ligg på teiknebrettet, Førdepakken, utbygging av næringsareal på Moskog og på Skei, mange bustadprosjekt, ny vidaregåande skule på Øyrane og ei stor investering ved Sentralsjukehuset i Førde for å nemne nokre. Tre idrettshallar og nytt hus for avlastningseininga er nokre av dei kommunale investeringane som vart ferdige i år.

Digitalt har vi tatt eit kvantesprang. Kven kunne førestille seg at elevane over natta kunne ha heimskule med digital undervisning. Kven kunne førestille seg at vi kunne gjennomføre digitale møte, konferansar og kommunestyremøte. Den lærdommen som er hausta, vil truleg forandre korleis vi møtast i framtida.

Samtidig har denne krisa utløyst kreativitet. Mange har imponert meg skikkeleg og fått til ekstremt mykje tross at pilene peikar i mot ein. Ekstremt mange dyktige folk som alle på sitt vis har bidrege med sin innsats og kunnskap til at totaliteten skal bli betre.

Eg vil jobbe for at Sunnfjord skal vere ein god stad å bu og leve, og vere ei sterk røyst for våre saker og interesser. I 2022 vil kommunestyret vedta kommuneplanen sin samfunnsdel. Planen legg viktige føringar for den framtidige utviklinga samtidig som den vil vere startskotet for andre viktige planar, til dømes arealplanen og bustadsosial handlingsplan. For den største utfordringa både vi og andre kommunar står framfor er utan tvil den store endringa i demografien. Å planlegge for ei slik framtid blir svært utfordrande, men også uvanleg viktig.

Det er ei ære å vere kaptein på ei skute med dyktig mannskap om bord både politisk og administrativt. Takk til kommunedirektør Ole John Østenstad, som er ein stødig og dyktig kar med høg kompetanse og stort engasjement. Takk for den solide jobben de gjer.

Til slutt vil eg ønskje alle ei god og fredeleg julehelg. Håper de får samle krefter til neste etappe. Eg ser fram til nye prosjekt og samtaler i året som kjem. Ei særleg helsing til dei som må arbeide på helgedagane i jule- og nyttårshøgtida. God Jul!

Jenny Følling

Bodil Kvamme har vore teatersjef i fem år ved Sogn og Fjordane Teater/Teater Vestland i Førde. For ei fantastisk reise vi har hatt med henne ved roret. Det er sett publikumsrekordar og halde framsyningar i alle kommunar med teater for alle.

Ho har vore ein sjef med bein i nasen som brukar små ord om seg sjølv, men er raus med ros til dei ho leiar. Ho er eit knakande godt menneske, og har hatt eit godt og nært forhold til Førde fordi ho som barn ofte besøkte farsgarden Kvamme i Angedalen.

Sjølv om det har vore tøffe år både for Bodil, då ho vart alvorleg sjuk, og for teateret, har ho alltid trykt på gassen. Ho har trakka opp nye spor for teateret, og har gjort at det umogelege kunne bli mogeleg. Å turnere med framsyninga «Vestland Vestland» i heile Vestland fylke og gjennomføre «Annie» med 160 skodepelarar i eit korona-år, står det verkeleg respekt av. Landet vårt er inne i ei av dei verste krisene sidan andre verdenskrig, men ved teateret er dei opplærde til å satse og gi publikum gode opplevingar der dei bur.

Bodil har vore ein dyktig og kunnskapsrik teatersjef. Ho er raus, truverdig, skarp, modig, utolmodig, hjelpsam, humoristisk og nyskjerrig og er meir enn ein teatersjef. Ho er også dramaturg og regissør. Utdanninga har ho frå Universitetet i Bergen, Universitetet i Århus og Hochschule fur Musik und darstellende Kunst i Wien.

Som dramaturg fekk ho Heddaprisen i 2006 i kategorien for særleg faglig innsats, saman med profilar som Idun Losnegård og Kyrre Eikås Ottersen. Prisen fekk dei for dokumentaren «Saman Skal Vi Leve», som handla om Arve Beheim Karlsens død i 1999.

Ho har jobba med teater i vel 30 år, har snust litt på film og utvikla konsept og manus saman med Bentein Baardson for opningsseremonien og avslutninga for OL på Lillehammer. Ikkje minst har ho har medverka i 90 teaterstykke med regi, manus, dramaturgi eller som oversettar frå 1972 og fram til i dag.

Teater Vestland er Norges største turnerande nynorskteater. I det komande året håpar eg bygginga av det nye teaterbygget kan starte. Frå å vera ein invitert gjest, er Teater Vestland blitt ein viktig premissleverandøren til «Nynorskhuset». Dette media og teatermiljøet kan verte ein bauta for å fremje det nynorske språket. I planlegginga har Bodil vore ein særs god konsulent for innhaldet i huset.

Ein epoke er over. Takk for din store innsats for å løfte Teater Vestland til nye høgder. No byter teatersjefen namn og nøklar. Stafettpinnen går vidare til dyktige Cecilie Grydeland Lundsholt. Ho trakka også sine barneskor i Førde, og har igjen flytta til Sunnfjord og busett seg i Bygstad. Vi gleder oss til mange gode opplevingar ved Teater Vestland.

Året 2020 skriv seg inn i historiebøkene som året då det uverkelege skjedde. Samfunnet vart stengt ned. Verden vart slått ut av Covid19.

Dette fekk det fram det beste i folket. Eg er stolt over dugnadsinnsatsen folk i Sunnfjord har vore med på. Takkar for bidraget de alle har gitt for at vi har komme oss gjennom dette krevjande året då vi både skulle etablere nye Sunnfjord kommune og samstundes vart ramma av korona. Eg tenker på helsepersonell, lærarar, leiarar, reinhaldarar og alle som har stått på for å halde hjula i gang. De har lagt ned ein formidabel innsats som fortenar stor respekt.

Eg tenker på alle som har opplevd tunge dagar. Det har vore einsamt å vere student med berre digitale forelesingar. Det har vore krevjande for bebuarar på sjukeheimane våre å ikkje kunne få besøk av sine kjære. Nokon har mista jobben, og veldig mange opplever stor usikkerheit for kva neste år vil bringe. Bedrifter har bukka under, folk har sett livsverket sitt gå i grus. Det har vore eit mareritt for turisme og hotellnæringa, og kulturen har blødd. Men dei som har hatt ein jobb å gå til, har kunne leve «nesten normalt» ved å ta nødvendige forholdsreglar.

Samtidig har denne krisa utløyst kreativitet. Mange har imponert meg skikkeleg og fått til ekstremt mykje tross at pilene peikar i mot ein. Ekstremt mange dyktige folk som alle på sitt vis har bidrege med sin innsats og kunnskap til at totaliteten skal bli betre.

Digitalt har vi tatt eit kvantesprang. Kven kunne førestille seg at elevane over natta kunne ha heimskule med digital undervisning. Kven kunne førestille seg at vi kunne gjennomføre digitale kommunestyremøte og fylkesting. Den lærdommen som er hausta frå digitale møte og konferansar, vil truleg forandre korleis vi møtast i framtida.

Koronaepedimien har sett sitt preg på det meste av det vi har gjort som enkeltpersonar, i næringslivet og offentlege myndigheiter i 2020.
 
I romjula kom vaksinebilen til Norge. Vaksinen som skal få samfunnet tilbake til normalen. Håpet om at alt skal ordne seg lyser i horisonten. Sjølv om det er mykje vi ikkje veit, er det viktig mentalt for folk å vite at hjelpa er på veg. At det skal bli nok vaksine til alle, og at neste år kan samfunnet ta til å normalisere seg.

Eg vil takke for innsatsen i dette krevjande året i Sunnfjord kommune. Håpar alle har hatt ei fredeleg julehøgtid og har samla krefter til neste etappe. Eg ser fram til nye prosjekt som dukkar opp og godt venskap og samtaler i året som kjem. Håper at 2021 blir det året vi kan klemme kvarandre igjen. Inntil det, ta godt vare på kvarandre.

Godt Nytt ÅR!!

Jenny Følling
Varaordførar Sunnfjord kommune og gruppeleiar for Sp

Vi har alle høyrt om byen mellom dei sju fjell, men kven har høyrt om byen mellom dei fem fjell. I sommar var ferien kortreist, og eitt av prosjekta var å oppedage nye kortreiste toppar.

Eg bestemte meg for gå på dei fem byfjella som omkransar Førde; Førdsnipa, Viefjellet, Hafstadfjellet, Halbrendsnipa og Eikåsnipa. Sunnfjordbyene har eit attraktivt turområde sentrumsnært. Som løn for strevet får vi flott utsyn frå hav til bre, like utanfor vår eiga stovedør.

Dette er kortreiste flotte turar. Sjølv om det er godt merka ruter opp på alle desse fjella, er det ikkje alltid like lett å finne fram. Oppturboka vart ein fast følgesvein.

Folk i Sunnfjord må bli stolte over byfjella. Dei er vakre, korteiste og lette som veldig mange kan greie å gå. Ein by med respekt for seg sjølv, har byfjell. Førde har fem. Alle desse turstiane bør merkast og marknadsførast godt. Vi treng å bli betre på å fortelle om desse perlene for at tilreisande oppedagar fjella og tek i bruk desse skattane.

Naturattraksjonar som kan bety mykje for profilering av Førde by. Dei kan skape fleire sentrumsnære aktivitetar. Dessutan gir aktiv fritid betre folkehelse. Det har ein stor verdi at vi er omgitt av fjell som gjev mulighet for kortreiste turar.

• 

Hafstadfjellet (706 moh) har god tilkomst frå mange kanter. Går du Hafstadkleiva startar oppturen frå sentrum sør. Frå Bruland og Langeland går det også veg heilt opp. Frå Bekkjavatnet det det er fin tursti. Denne går også går rundt heile Bekkjavatnet. Der har «Bymarkas venner» tilrettelagt på ein fantastisk måte, ikkje minst på Hundsrasta.

• 

• 

Viefjellet 709 moh) er min favoritt. God tursti frå Soleide. Der er fantastisk utsikt over Førde og vestover mot havet. Det andre merka startpunktet går frå Visåsen. Der er god sti, og på vegen oppover ligg den populære dagsturhytta Gytta. I heile sommar har folk valfarta til denne dagsturhytta. Den må vere den best besøkte i fylket, med heile 11.000 besøkande (mai, juni, juli) ein auke på 60% frå i fjor.

• 

• 

Halbrendsnipa (801 moh) – Starta på Reset i Førde og gjekk langs «Den Trondhjemske postvei» til eg svingar inn på ein skogsvei, som etter litt går over i tursti opp til toppen. Flott kveldstur og flott utsikt over Førde, Storehesten og Blæjene.

• 

Rundtur frå Fauskevarden (853 moh) til Halbrendsnipa er ein flott rundtur. Starta i Blomlia. God merka sti til Fauskevarden. Der er flott utsiktover Førdefjorden, Flokeneset og Naustdal. Det er utydeleg sti vidare Halbrendsnipa, men er fantastisk terreng med fin utsikt til Gjøset og ikkje minst Førde Lufthamn på Bringeland.

Eikåsnipa (826 moh) – Start ved Ryggjabrua i Angedalen. Følgde vegen opp til parkeringsplassen. Godt merka tursti til toppen med fantastisk utsikt både til Førde, Jølstravatnet, Jølster og breheimen. Ein fin tur med vakker utsikt.

• 

• 

• 

Førdsnipa (863 moh) er den mest krevande turen. Starta på Hjelle i Angedalen. God tursti opp på Hjellestølen og vidare opp på toppen. Veldig flott utsikt over Førde sentrum, Storehesten, Sandfjellet, Ålfoten, ja i alle retningar. Gjekk rundturen vidare vestover til Hornnesstølen med flott utsikt ut Førdefjorden, Erdalen, Naustdal. Veldig bratt nedstiging til Solsvingen på Hundvebakke.

Svar til Kjartan Myklebust i Firda 11. juli 2020.

Debatten om å utvikle eit attraktivt sentrum i Førde er viktig. Det har skjedd mykje positivt dei seinare åra. Det kjem også til å skje mykje framover. Sentrumsutvikling som vil løfte Førde sin attraktivitet og framheve elva Jølstra som eit smykke i sentrum.

Som du påpeikar, så har eg lenge vore opptatt av sentrumsutvikling. Det er eg framleis. Eg er opptatt av sentrumsutforming, møteplassar, god framkomst for bilar, syklande og gåande. Dette er viktig for alle som bur i sentrum, alle som pendlar til jobb i Førde, og turistar og dei som brukar handelsbyen Førde.

E39 – Fjellveien er ein av dei mest trafikkerte gatene i Vestland. Eit avgjerande grep er å få lagt E39 ut av sentrum. Eit samla kommunestyre vil jobbe hardt for å få E39-parsellen Storehaug-Bruland inn i første periode i Nasjonal Transportplan, og vi har fått Vestland fylkeskommune med på laget.

Om vi hadde starta med blanke ark, så kunne prioriteringane i Førdepakken kanskje sett noko annleis ut. Det er likevel slik at Førdepakken vart godkjent i Stortinget i 2015, etter ein omfattande prosess i Førde bystyre og godkjenning i fylkestinget. Dei 20 prosjekta som ligg i portefølgjen, er under planlegging. Nokre er gjennomførte medan andre er ute på anbod. Tiltak for 1,7 milliardar skal vere fullført i 2024. Sunnfjord kommune er ein av 3 likeverdige partar saman med fylkeskommunen og Statens Vegvesen. Sunnfjord kommune kan ikkje åleine ende prioriteringane.

Ein omkamp på prioriteringane i den storleik Myklebust ser for seg, vil slik eg ser det, vere skadeleg.

Det er knytt rekkefølgjekrav til vegprosjekta i Førdpakken. Mellom anna er det utløysande for utbygginga på Indre Øyrane og utbygginga av nye Førde vidaregårande på Øyrane til 700 millionar. Å kutte ut planlagde vegar, vil sette ein stoppar for fleire viktige utbyggingsprosjekt i Førde. Ny runde med prioriteringar og planlegging tek i tillegg tid og medføre auka kostnader. Difor meiner eg vi er best tente med å gjennomføre tiltaka slik dei blei vedtatt.

Kommunestyret har vore tydelege på at styringsgruppa skal sjå etter kostnadsreduserande tiltak. Det er viktig for å kunne gjennomføre alle prosjekta, også tiltak 20 – bru frå Steinen til Øyrane. Vi har også vore tydeleg på at kunstgrasbana framfor Førdehuset må bevarast. Det vert jobba med løysingar for det.

Med to nye bruer over Jølstra, ei gangbru og E39 ut av Førde sentrum, vil trafikksituasjonen i sentrum og Fjellveien betre seg. I tillegg gjennomfører vi no ein plan for etablering av nye parkeringsplassar.

På junimøtet i kommunestyret, prioriterte vi i tillegg tiltaka i 100 millionar-potten, som er reservert til mindre sentrumstiltak. Prioriteringslista er lang;

• Nye vegløysingar på Ytre Øyrane
• Gang og sykkelveg frå Øyrane vidaregåande til Firda Billag
• Gang- sykkelveg frå Hafstadparken til Hafstad
• Delfinansiering av høgresvingfelt i krysset frå Naustdalsvegen til Storehagen
• Fortau Kyrkjevegen frå Hornnesvegen til Langebruvegen
• Mindre tiltak og møblering i Førde sentrum
• Torg nord og sør for bru ved Naustøyna
• Fortau langs Tefrevegen
• Parkeringshus/-kjellar
• Gang og sykkelveg Brattebergkvia-Slåttebakkane
• Gang og sykkelveg frå Førdehuset til Hafstadåarken
• Nytt kryss til Vievegn ved Viebrua

Dette er mange viktige prosjekt som vi ynskjer å få gjennomført. Vi bør difor bruke meir tid på å skaffe pengar til det vi vil gjennomføre, og bruke mindre energi på skadelege omkampar.